محدش بيهتم بيّ!

أصعب ناس في التعامل هما الناس اللي مش بيشوفوا ان اللي بيعمله الناس لأجلهم كافي!

دايمًا يحس ان الكل مقصر معاهم ومحدش بيهتم بالقدر الكافي بيهم.. دايمًا مش ممتنين وحاسين ان مفيش حد بيحبهم..

أغلب الوقت بيلوموا الناس أنهم مقصرين معاهم..

عزيزي.. لو ده انت (وأحيانًا بقفش نفسي كمان  )

في الغالب ده علامة إني مش شبعان.. وبافكر بمنطق الضحية ..

وفي الغالب عندي مغالاة في تقدير نفسي.. شايف إني أستحق دايمًا الأفضل..

عزيزي ده السبب اللي من أجله مش باقدر أسامح أو أعذر الناس.. مش باعرف أحب اللي قدامي وأفكر فيه..

أنا شايف إني لازم أتحب أكتر من كده..

وده دليل إني مش حاسس وشبعان بمحبة الله لي..

عزيزي ده مش إضطراب في الشخصية، ولا علاجه نفسي!

ده قلب قاسي ومش شبعان من محبة الله.. وعلاجه الوحيد إن العينين تتفتح وتشبع من جمال المسيح..

تشوف هكذا أحب الله العالم اللي أنا منه .. أنا اللي في عداوة مع الله.. لكنه أحبني وأرسل إبنه لأجلي عشان يردني ليه ..

عزيزي حتى لو احنا مسيحيين كمان .. فده مش مبرر .. احنا ممكن مانبقاش حقيقيين بنتبع المسيح ومليانيين بيه ..

وممكن نضعف كمان ونخور .. محتاجين نذكّر قلوبنا بحقيقة الإنجيل..

لأني في الحالة دي أنا مُتعِب جدًا للي حواليا .. لأقرب الناس ليّ

ويا سلام كمان لو هما كمان نفس النوعية .. هتبقى مجزرة حب واهتمام وتجريح وعدم غفران ...

والنوع ده من العلاقات مستنزف جدًا للطاقة..

وعلاجه الحقيقي مش التنمية البشرية ولا الكلام بتاع حب نفسك و احضن نفسك..

علاجه الوحيد ان القلب يتفتح ويتملي من محبة المسيح.. غير كده مفيش حاجة اسمها نفسيات مريضة.. لأن كلنا نفسياتنا مريضة مهما كانت تربيتنا شبعانة ..

لما يتضغط عليا.. ولما ملاقيش تقدير .. هايطلع عرق الفساد ويبان ..

اللي شبعان منه هو اللي يحفظني ..

صلي معايا:

يارب يسوع بافتح لك قلبي.. اسكب محبتك في قلبي..

وريني انك مش مجرد انسان عادي لكنك الله المتجسد..

وريني انك ماجيتش تعلّم تعاليم جميلة .. لكنك جيت عشان تخلصني من موتي وخطيتي .. قلبي قاسي .. وغرقان في الخطية ..

أنا استاهل الغضب والدينونة الأبدية .. لكنك في رحمتك قدمت لي الخلاص..

يارب خد بإيدي انا باقبلك تكون ربي وقائدي.. اشفي قلبي من تسلط الخطية والفساد عليه .. افتح عيني وأعني..

آمين!